როგორც სხვა ძაღლებს, ჰეილისაც უყვარს სეირნობა და სიარული. დილის გასეირნება მისთვის დღის ერთ-ერთი ყველაზე ბედნიერი დროა და ამ ყოველდღიური საქმიანობისას ბევრი სხვადასხვა რამ ხდება და ჰეილიც უამრავ აქტივობას ასრულებს.

როცა ჰეილი ახალ ძაღლებს ხვდება და მეგობრობს, ძალიან მხიარულად გამოიყურება. თავიდან მორიდებით უახლოვდება, შემდეგ კი ერთმანეთს ყნოსავენ. თუ ერთმანეთი მოეწონათ, ხალისით იწყებენ თამაშს.

ძაღლების უამრავი ჯიში არსებობს, მაგრამ არ ეტყობა, რომ ჰეილისთვის მნიშვნელოვანია ჯიში, წარმომავლობა, სისხლი თუ გარეგნული თვისებები… ძაღლები ერთმანეთთან თავიანთი სტილით „საუბრობენ“ და თუ ერთმანეთი მოეწონათ, ნებისმიერ ძაღლთან შეუძლიათ დამეგობრება.

ჩვენ, ადამიანები, როგორ ვართ ამ მხრივ? განა ხშირად არ ხდება, რომ ადამიანებს მათთან რეალური საუბრისა და ურთიერთობის გარეშე, მხოლოდ გარეგნობითა და საერთო შთაბეჭდილებით ვაფასებთ ან მათზე გარკვეულ წარმოდგენას ვიქმნით?

ჰეილი ძალიან ცნობისმოყვარე გოგოა. ხალხმრავლობის გარდა ყველა ადგილი აინტერესებს და გადამთიელს თან მოჰყვება. ახალ ადგილას რომ მივიდნენ, აქეთ-იქით ყნოსავს და ინფორმაციას აგროვებს, სწავლობს და იმ ადგილასაც ეჩვევა.

ამდენი გულმოდგინე კვლევა-ძიების შემდეგ პატრონთან ბრუნდება და გვერდით წევს, ან სხვა ძაღლებთან ერთად თამაშობს, მხიარულად ატარებს დროს.

შარშან შავი ზღვის სანაპიროთან ახლოს ცხოვრობდნენ და ზღვაზე დადიოდნენ ხოლმე. ჰეილისაც მოეწონა სანაპირო და ზღვა, ცურვაც შავ ზღვაში ისწავლა. ახლა მანდ აღარ ცხოვრობენ და გადამთიელს ხანდახან ეჩვენება, თითქოს ზღვა ენატრება..

ყოველ შემთხვევაში, ჰეილი ბუნებაში უბედნიერესია. გადამთიელს სურს, რომ რაც შეიძლება ბევრ ადგილას წაიყვანოს და ლამაზი ბუნება რაც შეიძლება ბევრგან დაანახოს.

იაპონელი გადამთიელის მიერ შექმნილი ჰეილის დღიური.

7 წელი გავიდა მას შემდეგ, რაც გადამთიელი მარტო ჩამოვიდა საქართველოში, მე-4 წელს მან ჰეილისთან ერთად დაიწყო ცხოვრება, დროთა განმავლობაში მათ შორის ჩამოყალიბდა ოჯახური, მეგობრული და ალერსიანი ურთიერთობა, რომელიც მხოლოდ ადამიანისა და ძაღლის ურთიერთობა კი არა, ორი განუყოფელი ნაწილის კავშირია.

ბედნიერება და სიცოცხლე იმდენ ხანს არ გრძელდება, რამდენ ხანსაც გვგონია, ამიტომ გადამთიელს მოუნდა, შეენახა ჰეილის სილამაზე და მასთან ერთად გატარებული დრო ― ფოტოგრაფიისა და ბლოგის სახით.

ჰეილი ალერსიანი და ერთგულია. ის ყოველთვის გადამთიელთან ერთად არის, ან სახლში მოუთმენლად ელოდება მას, როცა გადამთიელი გარეთ არის.

ჰეილი არის მისთვის მზე, რომელიც მისი მარტოობის ჩრდილს ანათებს, ხოლო ზოგჯერ ― წვიმა, რომელიც მის გამხმარ გულს აგრილებს და კურნავს.